Alrond e magike foxo

Evgeny A. Khvalkov

Ob yu gwo audi historia om Alrond e magike foxo? Bu es mushkil fo rakonti.

Magike foxas ya haishi jivi kelkelok in munda til sedey. Es hampi buposible tu kapti li bikos li es muy forte in magia. E koyves, wen tal foxo lopi tra shulin al tachi baum e bush bay kauda, mucho agninka en-flai fon kauda a skay e poy lwo bak a arda; jenta nami sey agninka "lwo-she stara". Yedoh, koyves magike foxo apari miden jenta. Om se hi may rakonta sal bi.

Gro-longtaim bak ye lao riter kel jivi pa kabu Bertoari, e lu hev tri son. Wen lao jen morti, zuy yash-ney son, segun abyas, heredi kastela e oli landa, mide son heredi kirka in vilaja e posta de preiyuan, e zuy yunge-la, Alrond, heredi sol zian de suy patra e lao kaval. Zuy yash-ney brata dai a Alrond un pan-lokma e un ham fo dao e komandi ke lu go wek fo shuki suy fortuna otrelok.

Alrond tayari fo go e dumi om go a Adtiarn a korta de rego Taravon. Lu, jenta shwo, pagi hao a kuraje e intele nobla. E Alrond en-go a urba Adtiarn.

Kelke taim pasi, Alrond en-sta fatige e hunge, en-sidi fo chi pa shulin-ofnelok. Turan, fas de foxo ek-apari aus kalina-bush. Foxo kan an Alrond, e Alrond kan an foxo. E foxo shwo a lu:

"Namastee, yunga! Yu hev hao ham dar. Ob yu'd mog ugosti me, ob yu'd parti un pes?"

E obwol Alrond hev nul otre chiwat krome toy pan e ham, lu es ya hao yunga, also lu ugosti foxo bay ham-pes e rakonti a ta komo suy bratas he trati ta e ke lu zai go a Adtiarn a korta de rego Taravon.

- Wel, - shwo foxo, - avos i me treba go kun yu fo probi may fortuna? Yu es hao yunga, me vidi, bat yu es ga inosente, e me es anubav-ney wan in diverse durtitaa, shayad me mog koykomo helpi yu. E wen nu arivi a Adtiarn, yu ve hunti guardia de rego Taravon, e me ve bi tradukter fo kansler Berengar. Me jan ya oli lingwa: i garegin, i adelni, e iven lingwa de igeruldas.

"Wel," shwo Alrond, "es pyu hao tu go pa hunta. Go kun me!"

E li go a urba Adtiarn. Dan li lai, e rego Taravon pren nuy Alrond kom suy personale gardiyuan, bikos guardia-shefa bin lao amiga de morti-ney patra de yunga, e Alrond simili suy patra in fas, kuraja e rasum. E foxo zin kanslerguan e surprisi kadawan bay jansa de lingwas: i skriber, i konsiler, i kansler, i rego selfa oli divi por sajitaa de foxo.

Rego hev un docha do gami-yash. Tuy ke ela vidi Alrond, ela inlubi gro in lu; yungo toshi bu es egalsente versu prinsesa. Bat in toy regilanda ye abyas segun kel ni prinsesa darfi selekti dulho ni iven patra-rego darfi, kom in hampi oli regilanda, aranji gaming de suy docha pa selfa. Gai organisi gran kompeta kel-ney jiter hi mus gami prinsesa. E sikom prinsesa es do gami-yash e ela es sole docha de rego Taravon, yoshi sikom rego selfa es yo do lao yash, kansler e konsiler begin tedi-shwo a ta om ke treba sun hi aranji kompeta e gaming de prinsesa.

"Nu yao," li shwo, "ke yur heredi-sha es prinsa o riter gloria-ney, brave, intele, in kada aspekta laudival. Nu bu yao otre rega!"

Rego mus-nem konsenti aranji kompeta.

Alrond lai a dom fon serva triste hi, e foxo kwesti lu:

- Way yu sta tanto triste, al kansa nich, may amiga?

- Komo bu sta triste! – jawabi Alrond. Rego he deklari kompeta, e wan kel jiti, ta ve gami prinsesa. May lubigela sal gami koy auslanda-ney prinsa or riter.

- Yu toshi mog partisipi in kompeta, - shwo foxo. - Obwol yur patra bin povre riter, e yu selfa es yoshi pyu povre, bat yur familia es noble, pa laotaa it mog kompeti kun familia de koy rega. Yoshi, yu es jen do vigor e intelitaa!

- Ver, - shwo Alrond, - bat me senti ke proba dar sal bi bupinchan: bu tu batali kun lanza, shuti bay arku e batali bay zian.

- Bat yu ya hev me! Me ve helpi yu duyfu proba de rego," shwo foxo.

Alrond dumi om se e konsenti. E foxo ek-mavi kauda, e golda-ney aginka lwo on yunga – e obwol Alrond i bifooen es gro-ney jamilnik e bravnik, nau lu brili kun magike luma, e lu bikam sam forte kom trishi fortenik.

Wen taim fo kompeta lai, arivi a Adtiarn da oli rega, prinsa, duka, komta, baron e riter fon tote Weste Sahil, e kelkes iven fon Islalot. Duran un-ney tri dey ye torneo, shikaring e festachia. Alrond es sempre avanen otres in oli kosa: in lanza-batala, zian-batala, arku-shuting, arbalet-shuting; yoshi lu dansi zuy hao e suluki latifem – kom digne dulho fo prinsesa! Bat regale kompeta es pyu mushkil kem korta-dansing.

Taim fo un-ney proba lai. E rego shwo:

"Duko Larhelm fon Moremont pa laste yar doni a me miraklalik gren-semena kel produkti rekola do petsto ves pyu, e pan aus toy wit hev mirakla-ney osobitaa: un syao pes sufi fo mah-chi adulte man. May kisan semeni agra bay sey miraklalik gren, e ver, rekola es nopinchan. Yedoh, ye beda: koywan lai pa nocha e chi wit. E wen me rassendi gardiyuan fo kapti bujan-ney chori-sha, li oli en-somni. Hu fon yu, gloria-ney riter, ve protekti may agra kun mirakla-wit? Hu ve kapti enigme rauber e mah ta lai a me?

Oli rega, prinsa, duka, komta, baron e riter fa-perplexe, e Alrond toshi. Lu lai a dom e rakonti a foxo om regale taska. E foxo shwo:

"Mi jan hu chori wit – es probus-ney monsta. Audi ba me, somni ba hao, e pa nocha nu ve go wahti agra. Sol bye fogeti tapi aures".

Also li zwo tak hi. E wen pa nocha oli rega, prinsa, duka, komta, baron e riter go wahti agra, probus-ney monsta lai e mah-chu trumpetalik suon – dan oli en-somni. Alrond he tapi aures, kom foxo konsili a lu, e lu bu en-somni. Tuy ke chori-sha en-pasturi pa regale agra, Alrond e foxo begin kapti probus-ney monsta. Duran longtaim li bu duyfu til ke foxo ek-salti an monsta e lansi korda an ta.

Pa sabah Alrond mah-lai probus-ney monsta a rego. Rego es surprisen, ta laudi e danki Alrond. Oli auslanda-ney rega, prinsa, duka, komta, baron e riter en-sta envishil: li ya he somni duran ol nocha al ke Alrond e foxo kapti monsta! E li fai komplot kontra Alrond, bat bu diki se.

Taim fo dwa-ney proba lai. E rego shwo:

- Pa prelaste yar rego Etelstan fon Damiria doni a me un gurta de goldamao-ney yan. Nau es taim fo kati ley mao. E ley mao es pure golda, bat treba shwo ke sey yan es ga muvishil e kaprisishil, e til nau nulwan he duyfu kati ley mao. Hu fon yu, gloria-ney riter, mog kati yan, jami golde mao e bringi it a me?

Oli rega, prinsa, duka, komta, baron e riter fa-perplexe, e Alrond toshi. Lu lai a dom e rakonti a foxo om regale taska. E foxo shwo:

"Bu es mushkil, may amiga Alrond. Audi ba me, somni ba hao, e manya nu ve go kati goldamao-ney yan.

Pa sabah oli yao gami prinsesa na wan begin kapti goldamao-ney yan, bat yan es muy kway e kaprisishil, also nulwan duyfu kati iven un pes de golde mao. Pa fin tur de Alrond lai. Dan foxo, suy fidele amiga, en-sidi on tudun wo yan pasturi, auspren un flauta e en-baji. Oo, to es ya gro-jamile musika! Oli yan gurti sirkum foxo e audi magike musika kwasi mah-jadu-ney. Nau es fasil fo Alrond tu kati ley mao.

E bu sol yan es mah-jadu-ney! Klare, sonore suon de musika charmi rego, kortayuanes, sekwita e oli wan kel ye dar. Oli en-silensi e zai audi kwasi pa stupor. Savaje shulin-ney animal lai aus ley dun e lagilok fo audi diva-ney musika de foxo. Leon, animal-rega, bu osi grauli, dabe bu interrupti diva-ney musika, wulfa fogeti wuling e govo fogeti braisa. Iven lao Greta, kel jivi bli Abisma-in-Yaruga e kel es dusfama-ney por muy bade karakter (ela bu mog bi kun otres un hi minuta sin kwereli), also iven lao Greta selfa lai aus e audi musika kun mahaba. Melodia ke foxo mah-aus fon suy flauta, it transformi olo sirkum inu mandir de musika.

Rego sta pa admira por ke Alrond he duyfu zwo dwa-ney taska, yoshi pa dwaple admira por audi tal magike musika. Lu sinserem danki Alrond e foxo, e auslanda-ney rega, prinsa, duka, komta, baron e riter hampi fa-bangi por enva e ira. E un de li, rego Gerneb fon Lotirod, shwo:

- Si sey riter duyfu pasi tri-ney proba, lu ve pai prinsesa, e nu ve mus go wek al vakue handas, iven shmahisi-ney, bikos koy povre shma-soldata es pyu gao kem nu, persona do krona! Nu ambushi ba lu manya pa sabah bifoo tri-ney proba e kili lu! Dan nu ve eviti nohonor.

E li desidi zwo tak hi. Bat li bu jan ke pa toy taim foxo bin baken kurtena e audi olo. Ta lai a dom e rakonti a Alrond om dusplan de auslander.

"Kwo ya zwo?" - shwo yunga.

"Fidi ba me," foxo jawabi, "bat remembi ke manya nu ambi treba i juli dushman i duyfu pasi laste proba!"

Taim fo tri-ney, laste proba lai. E rego shwo:

"Me yao ke may futur-ney son-inloo fai luxe festachia in suy prope kastela fo me. Hay resiva es regale! Me bu ve dai may docha a povre jen".

Oli auslanda-ney rega, prinsa, duka, komta, baron e riter alarmifi. Sertem, li hev magnifike palas e kastela in ley prope region – bat oni ya bu mog ni raki adar kun rego pa un hi dey, ni bringi toy palas e kastela a Adtiarn, komo unkwe oni peni! Yedoh, char zuy riche rega emploi po sto gunjen e enkargi li bildi kastela bli shefurba tuy, – bat oni ya bu mog bildi kastela pa un hi dey! Alrond toshi fa-triste, bat foxo tachi ta e shwo:

- Me sal go pai kastela fo yu. E yu chauki ba auslander wen yu go shikari!

E foxo lopi versu kastela Kromorgan. Treba shwo ke sey kastela perteni a terible trol, gro-dushte e gro-brutale. Mucho daojen kel go pas kastela Kromorgan, li fini jiva in denta de kruel jenchier. Trol chi jen bat bu chi foxa, also nuy durtenik hev nixa fo fobi; krome, al toy taim trol bu es pa dom – lu he go shikari. Kom un-ney kosa, foxo desidi mah-wek trol-ney servi-sha kel gardi kastela. Toy tri gardi-sha es gnol Grau, goblin Grou e gremlin Grahaham. Foxo lopi-lai a geit, krai:

- Salvi swa! Eskapi ba! Ahir zai raki rego kun armee e sto magier! Li sal peplisi yu oli bay bliza!

Servi-sha de trol alarmifi. Kwo li treba zwo? E foxo shwo a li:

- Ahfi swa kway! Mogbi rego, suy armee e sto magier bu merki yu.

Servi-sha de trol es fobnik, also li tuy kwiti ley gardi-posta. Gnol Grau ahfi swa in vakue bira-barela-ki, goblin Grou ahfi swa in vakue vino-barela, e gremlin Grahaham ahfi swa in vakue kalvados-barelakin (trol pri kalvados gro). Dan nuy foxo klosi li oli bay kapak, roli barelas a fortesa-mur e mah li lwo inu handak – hay li swimi dar!

Pa intertaim, dushte trol to dom-masta returni e sta pa surprisa al vidi ke suy servi-sha es disapari-ney a koylok e ke koy garibe foxo es apari-ney in suy prope kastela. Bat nuy foxo es ya zuy latif sinior, also fo ta bu es mushkil tu charmi trol. Jan-yen ke trol gro-pri lesta, foxo begin deskribi in kada posible aspekta den dasin de trol e den fama kel sirkuli om ta in oli visin-ney regilanda.

E treba shwo ke sey trol hev dwa kapa, e li oftem kwereli inter mutu. E ti foxo inventi na kosa es – ta repeti oltaim pyu gro-ney laudi-worda nau a un kapa, nau a otre-la, also ambi kapa begin kwereli e pa fin fai morta-batala. Dan foxo kripi kyetem adar wo trol kipi suy agude kurve zianes, ga kom toys ke kamelyuan yusi al batali in sahra, e bay kushale darba ta wekkati ambi kwerelishil kapa de dushte trol. E depos dan oli daojen sta anchun in toy landa!

Pa intertaim, rego Taravon shikari kun suy kortayuanes, sekwita, e kun auslanda-ney rega, prinsa, duka, komta, baron e riter, kel, kom yu oli remembi, komploti kili Alrond. Al goni afte hiran, Alrond dalifi fon ol sekwita e es sole, dan auslander begin persekwi lu. Ley zian es aus, ley arbalet es sharji-ney, e sun yungo wud lusi jiva si suy foxo bu wud helpi lu!

E foxo, afte ke ta en-hev magnifike kastela de dushte trol e afte ke ta komandi tayari vere regale festachia dar, ta hasti a shulin wo oni shikari. Pa toy taim in sey shulin ye un muy lao, haf-kaput-ney ponta. Ewalaa, wen dushman yo blisifi a Alrond e en-shuti an lu bay arbalet, foxo - ta es ya magike foxo! – fo kurte taim transformi aspekta de suy amiga inu foxa-ney aspekta e ahfi lu in dun, duran ke ta selfa fa-transformi inu yungo, yus kom Alrond - yu bu wud mog iven fai distinta! Auslanda-ney rega, prinsa, duka, komta, baron e riter fa-lansi afte ta, e foxo in aspekta de Alrond salti nich fon suy kaval e lopi pa lao ponta a otre sahil. Auslander dumi ke viktima es yo in ley handas, fa-lansi afte ta pa lao haf-kaput-ney ponta, ewalaa ponta krushi, also li oli tabahi.

Pa intertaim, rego fa-hunge e zai weiti festachia. Foxo returni a Alrond den jen-ney aspekta e a swa den foxa-ney, e li ambi returni a rego.

"Yur Mahantaa," foxo shwo latifem, "sinior Alrond respektem inviti yu tu fai chia pa suy kastela.”

Rego fa-surprisi. "Komo, Alrond? Kastela de yur patra es pa shi dey de raida fon hir, e it perteni a yur pyu yash-ney brata segun prinsip de sobrenesa."

"Mi mah-serte yu, Yur Mahantaa," foxo hasti shwo, "ke sinior Alrond hev hi kastela, e zuy magnifike-la".

E foxo dukti Alrond, rego e ol sekwita a kastela Kromorgan, kel haishi nodavem perteni a dushte trol e nau perteni a foxo-ney amiga, riter Alrond. Wen li ateni kastela, rego sta pa admira, bikos kastela Kromorgan es sam luxa-ney kom regale palas, e festachia bay kel foxo e Alrond

ugosti rego e suy sekwita es ya verem regale. Rego sta ga charmi-ney, e pa same festachia anunsi dulhifa de Alrond e prinsesa, yoshi anunsi ke Alrond ve heredi tron.

E magike foxo, kwo om ta? Foxo, wen gaming es fini-ney, shwo adyoo e lopi inu shulin – ta es ya savaje animal, obwol poy lu koyves lai visiti suy amiga.

Walaa olo, may amigas! Alrond noavarem dai a foxo lo laste, e al fin lu bikam rego.


Versions of Alrond and the magic fox


Information about Lingwa de planeta

https://en.wikipedia.org/wiki/Lingwa_de_planeta
http://www.lingwadeplaneta.info/en/index.shtml

Stories

Fables About Animals | Alrond and the Magic Fox | The Second Wish


Green Web Hosting - Kualo

Why not share this page:

 

If you need to type in many different languages, the Q International Keyboard can help. It enables you to type almost any language that uses the Latin, Cyrillic or Greek alphabets, and is free.

If you like this site and find it useful, you can support it by making a donation via PayPal or Patreon, or by contributing in other ways. Omniglot is how I make my living.

 

Learn a nuevo language while you browse with toucan

Note: all links on this site to Amazon.com, Amazon.co.uk and Amazon.fr are affiliate links. This means I earn a commission if you click on any of them and buy something. So by clicking on these links you can help to support this site.